Преподобный Евфимий Великий

Дни памяти (20 января ст.ст., 2 февраля нов.ст.)

житие (смотреть)

Акафист прп. Евфимию Великому

Тропарь, глас 4

Веселися, пустыня нераждающая, благодушствуй, неболящая, яко умножи тебе чада муж желаний духовных, благочестием насадив, воздержанием воспитав добродетелей совершенство. Того молитвами, Христе Боже, умири живот наш.

 

Кондак, глас 8

В честнем рождестве твоем радость тварь обреете и в божественней памяти твоей, преподобне, благодушие прият многих твоих чудес, от нихже подаждь богатно в душы наша и очисти грехов скверны, яко да поем: Аллилуиа.

 

 

Кондак 1

Избранный Богом Всевидящим в слуги Себе прежде рождения твоего, плоде красный родителей бесчадных, имя носяй утешению тезоименитое и воистину явивыйся утешение многим, моли Господа, Емуже послужил еси верне, избавити ны от всякаго зла, да радостно вопием ти: Радуйся, отче преподобне, великий Евфимие.

 

Икос 1

Ангельскому чину посвятити тя обещаша родители твоя, Евфимие, еще прежде рождения твоего: сей великий обет совершающи матерь твоя Дионисия, приведе тя, отрока бывша, ко брату своему пресвитеру Евдоксию, сей же отведе тя ко Мелитийскому епископу Отрию, сказующе ему о видении и гласе Божественнем, возвестившим рождение твое. Возрадовася же епископ сему, возопи:

Радуйся, блаженное отроча, яко воистину Дух Божий почи на тебе.

Радуйся, дивным промышлением Божиим от юности мир оставивый.

Радуйся, возлюбивый тишину и безмолвие.

Радуйся, учителей твоих Акакия и Синодия великое утешение.

Радуйся, украшение Церкве нашея явивыйся.

Радуйся, яко матерь твоя блаженная Дионисия, верне Церкви послужившая, диакониса поставися.

Радуйся, в чистоте душевней и телесней воспитавыйся.

Радуйся, жизнь свою безраздельне Господеви вручивый.

Радуйся, отче преподобне, великий Евфимие.

 

Кондак 2

Видя епископ Мелитийския Церкви усердное твое, Евфимие, к научению божественных книг, таже девственное и добродетельное житие твое, постави тя пресвитера и вручи ти старейшество и попечение о монастырех. Ты же, блаженне, возскорбел еси о сем, возлюбивый безмолвие и еже в тишине пети Богу ангельски: Аллилуиа.

 

Икос 2

Разумом мудрости божественныя просвещенный, Евфимие, уясняя, яко ради спасения души твоея полезнее есть безмолвное уединение неже начальствовати, укрылся еси в пристанище небурное в Лавре Фаранстей, и тамо Господеви угождал еси, сего ради зовем ти таковая:

Радуйся, смиреннейший паче всех иноков.

Радуйся, поставленный старейшим над ними.

Радуйся, о монастырех попечителю.

Радуйся, монашескаго жития рачителю.

Радуйся, похвалы человеческия возненавидевый.

Радуйся, сего ради в Лавру Фаранскую бежавый.

Радуйся, вселивыйся в келии уединенней.

Радуйся, тамо от трудов рук своих питавыйся, Богу непрестанную хвалу воздавал еси.

Радуйся, отче преподобне, великий Евфимие.

 

Кондак 3

Силою братнея любви связани быша преподобнии Евфимий и Феоктист, в двух телесех якобы едину душу и едину волю имевшии, навыкоша на всякое год во осьмый день по празднице Богоявления Господня исходити в пустыню Кутиллийскую, идеже даже до светлаго Христова Воскресения пребываху, постом плоть свою изнуряя, души же веселяще песнию: Аллилуиа.

 

Икос 3

Имуще желание совершеннаго уединения, обретоста святии друзи пещеру и возрадовастася о ней яко о Господнем указании има места, и паки не возвращаяся в Лавру, вселистася в той пещере, былием питающеся. Видяще таковое мудрое устроение монашеское взываем ти, преподобне отче Евфимие, сице:

Радуйся,  уединения ради Лавру оставивый.

Радуйся, узами святыя дружбы с Феоктистом сочетанный, купно с ним в молитве ко Единому Богу пребывавый.

Радуйся, яко убежище ваше ведомо сотворишася людем: и потекоша к вам жаждущия спасения и от болезней исцеления.

Радуйся, яко приходящих к тебе, отче Евфимие, направлял еси к другу твоему Феоктисту, не хотяй лишитися безмолвия.

Радуйся, яко в малом времени киновия зде учредися и пещера ваша, первее зверем пристанище бывшая, в Церковь претворися.

Радуйся, яко братия помыслы своя тебе открывати навыкоша.

Радуйся, яко поучал еси истинному монашескому пути.

Радуйся, яко полагал еси спасение наипаче в смирении и послушании.

Радуйся, научавый отсечению воли своея.

Радуйся, отче преподобне, великий Евфимие.

 

Кондак 4

Бури и мятежа мирскаго бежавшии блаженни суть, иже под покров Евфимиевой киновии укрышася! Ибо обретоша ту мир и безмолвие, паче же тебе, отче преподобне, наставника премудраго, поучающаго о всем благодарне к Богу взывати: Аллилуиа.

 

Икос 4

Слышаще братия поучения твоя, отче Евфимие, умиляшеся сердцем, духом же к небеси устремляшеся, тебе же, врачу душ их, вопияше:

Радуйся, наставниче премудрый.

Радуйся, врачующий духовныя немощи безмездно.

Радуйся, призываяй всех хранити воздержание.

Радуйся, научаяй укрепляти память смертную.

Радуйся, повелевый иноком не отметатися трудов телесных.

Радуйся, научаяй подражати во всем святому Апостолу Павлу.

Радуйся, поучаяй боятися огня вечнаго.

Радуйся, призываяй наипаче любити славу Царствия Небеснаго.

Радуйся, отче преподобне, великий Евфимие.

 

Кондак 5

Богоизбранная звезда явился еси, святый Евфимие, егда начальник сарацын Аспевет с болящим сыном отроком Теревоном возжелаша восприяти святую Христову веру: явился бо еси, преподобне, ему спящу, и поведал еси тому, да приидет к тебе в пустыню и исцеление обрящет. Пришедшим же им с вои сарацынскими к тебе, исцелил еси болящаго отрока Теревона. Вси же уверовавше во Христа и крещение святое от тебе приимше, Богу радостно воспеша: Аллилуиа.

 

Икос 5

Видеша и слышаша сия, болящии мнози начаша стекатися к тебе, врачу безмездный, блаженне Евфимие, и исцеление получая, прославляху тя по всей стране той. Ты же, святый, не терпяще славы, оставил еси киновию тай, взем с собою единаго от ученик своих Дометиана, изшел еси в пустынь при Мертвом мори и обретше келию ветхую при горе Марда, вселился еси ту. Оттуду же преселился еси в пещеру, идеже иногда Давид скрывашеся от лица Саула, и создал еси, Евфимие, тамо монастырь. Чудесем же тобою творимым умножися слава твоя и паки отшел еси, обретше пещеру малу близ киновии Феоктистовы, вселился еси в ней до кончины своея. Мы же, видяще таковую любовь твою к безмолвию, со умилением восклицаем ти:

Радуйся, пустынное житие наипаче возлюбивый.

Радуйся, многия неверныя к вере Христовой обративый.

Радуйся, манихейскаго зловерия обличителю.

Радуйся,  христиан православных в истинней вере укрепителю.

Радуйся, чудесы твоими прославивый Бога.

Радуйся, славы человеческия противник бывый.

Радуйся, многи монастыри таже и Лавру великую создавый.

Радуйся, яко восполни Господь оскудение хлеба, вина и елея по благословении твоем.

Радуйся, отче преподобне, великий Евфимие.

 

Кондак 6

Проповедник истиннаго покаяния и послушания был еси, великий Евфимие, таже увещавал еси, еже непотребно есть от своего монастыря бегати, лучшаго ищущи, но благо есть пребывати в келии своей, терпяще вся тяготы жития иноческаго, Богу же поя: Аллилуиа.

 

Икос 6

Возсияв духом пророческим, Евфимие, прозрел еси Анастасия сосудохранителя - патриарха быти, егда той прииде к тебе, такожде и иныя чудеса сотворил еси; поучением же многим братию наставлял и вразумлял еси. И нас, грешных и непотребных, вразуми и научи образом жития твоего богоугодная творити, поющих ти сице:

Радуйся, прозорливче, будущая аки настоящая зревый.

Радуйся, многия болящия исцеливый.

Радуйся, многими наставлениями учеником твоим образы покаяния показавый.

Радуйся, уверяяй, яко не место, но душевное устроение ко спасению приводит хотящих спастися.

Радуйся, яко молитвою твоею дождь низвел еси с небеси.

Радуйся, яко послуша Господь выну молитвы твоя.

Радуйся, яко мольбами твоими подаде Господь плодородие велие земли той.

Радуйся, яко поучении твоими умножишася иноцы истинныя в Лавре твоей.

Радуйся, отче преподобне, великий Евфимие.